"Qarabağ" səfərdə "Dinamo" ilə görüşdə böyük hesabla məğlub oldu. Əslində bu məğlubiyyət gözlənilən idi. Matçdan əvvəl, oyunun "Qarabağ" üçün çətin keçəcəyini və bunun səbəblərini yazmışdım (Bundan əvvəlki postda oxuya bilərsiniz). Fikrimcə matçda əsas diqqət çəkən 5 məqam:
1. Buntiçin inamsız və çox zəif oyunu. "Ludoqorets" ilə matçda olduğu kimi, bu oyunda da qapıçı Buntiç sadəcə zəif oyunla yadda qaldı. Bu cür performans ilə, o, Qarabağ tarixinin ən zəif qapıçılarından biridir.
2. Medina keçən mövsüm aldığı ağır zədədən sonra hələ də əvvəlki formasını yığmayıb. Xüsüsən "Qarabağ" cinahdan hücüma çıxanda cinah oyunçularını sığortalamaq üçün Bəhlul tək qalırdı. Bildiyimə görə, may ayından "Qarabağ" yeni mərkəz müdafiəçisi axtarışındadır.
3. "Qarabağ"ın onurğası olan orta sahədə ciddi problemlər var. Romao və Patrik ideal formalarından uzaqdırlar. Yankoviçin zədələnməsi isə, "Qarabağ" üçün əlavə problem yaratdı.
4. "Qarabağ"da komanda içində lider yoxdur, Maksimin gedişindən sonra kapitan olan Zubir, yüksək oyun keyfiyyəti olsa da, çətin anda komandanın psixologiyasını dəyişə biləcək lider deyil. Məhz buna görə "Dinamo"nun ikinci qolundan sonra "Qarabağ" klubu psixoloji olaraq "sındı". Hesab daha böyük ola bilərdi. "Qarabağ" həmişə adətən motivasiya komandası olub. Bir zamanlar oyunçularının maaşsız, günlərlə məşq etmədən meydana çıxıb çempionluq üçün oynamaqlarına səbəb məhz motivasiya olub. Amma bu gün, oyunçularda o motivasiyanı yaradacaq güc yoxdur Zubirdə. Rəşad Sadıqov gedəndən sonra da oxşar problem qısa müddətlik oldu "Qarabağ"da, amma sonra Maksim Medvedev komandanı içəridən toplaya bildi. Hal hazırda o boşluq yenə hiss olunur. Komandanın içində isə, o boşluğu doldura biləcək insan kimi Toral və Riçard görünür.
5. Azarkeşlərin reaksiyası təəssüf doğurur. Əksəriyyəti "futbol bilicisi" çıxıb və klubun transfer siyasətini tənqid edir. Adi bir misal deyim, Azərbaycanda 99% insana Avropada yaşamaq təklif edilsə, burdakı işini atıb qaçaraq Avropaya gedər. İndi, Avropada oynamaq və yaşamaq şansı olan hansısa oyunçu niyə Azərbaycanda yaşamaq istəsin ki? Birdə bura azarkeşsiz, pis gündə olan stadionları, ölkədəki zəif futbol təsərrüfatını əlavə edək. Digər bir qrupda "Qarabağ"ın məğlubiyyətinə sevinən "incidilmiş" qrupdur.